???????????????????????????? ???????????????????????????

རོང་བཙུན་འཇིགས་མེད་འོད་ཟེར།མཚོ་ལྷོ།

ཚོགས་གཉིས་མཐར་ཕྱིན་སྟོན་པ་ཤཱཀྱའི་ཏོག།

འཇམ་དཔལ་ངུར་སྨྲིག་རྣམ་རོལ་ཙོང་ཁ་བ།།

བཀའ་དྲིན་གསུམ་ལྡན་བསེ་ཚང་རྡོ་རྗེ་འཆང་།།

རྣམ་གསུམ་དབྱེར་མེད་ཞབས་ཀྱི་པདྨོར་འདུད།།

བློ༷་ཆེན་རྒྱལ་ཀུན་འདུས་པའི་བདག་ཉིད་སྐུ།།

སྐལ་བཟ༷ང་ཚོགས་ལ་ཐར་པའི་ལམ་སྟོན་གསུང་།།

དཔ༷ལ་ཀུན་ཡོན་ཏན་མ་ལུས་ལྷུན་རྫོགས་ཐུགས།།

གསུམ་ལྡ༷ན་རྗེ་བཙུན་བླ་མས་དངོས་གྲུབ་སྩོལ།།

སྐུ་༵ཡི་མཚན་དཔེ་གསེར་ལྗོངས་ཡུལ་དུ་བཞད།།

ག༵སུང་གི་བུ་སློབ་རྒྱལ་ཁམས་ཡོངས་ལ་ཁྱབ།།

ཐུག༵ས་རྗེ་འོད་ཀྱིས་འགྲོ་རྣམས་བདེ་ལ་བཀོད།།

ང་ཡི་སྐྱབས་མཆོག་བླ་མ་བསེ་ཚང་ལགས།།

གོང་ས་སྐྱབས་མགོན་ཉི་ཟླ་རྣམ་གཉིས་དང་།།

སྐྱབས་རྗེ་ཨ་རོལ་རོང་སྟོན་བདུན་པ་སོགས།།

བསྟན་འཛིན་སྐྱེས་ཆེན་དམ་པ་བཅུ་ཕྲག་ལྷག།

བསྟེན་ཏེ་མདོ་སྔགས་མཐའ་དག་ཐུགས་སུ་ཆུད།།

སྐུ་ན་གཞོན་པའི་དུས་ནས་འབྲི་ཀློག་དང་།།

སུམ་རྟགས་སྙན་ངག་ལོ་རྒྱུས་སོགས་ལ་སྦྱངས།།

ཁྱད་པར་བཀའ་པོད་ལྔ་དང་རྒྱུད་སྡེ་བཞིར།།

ཐོས་བསམ་སྒོམ་སྒྲུབ་གནང་བའི་རྣམ་ཐར་ཆེ།།

ཐོས༵་པ་གཙོ་ཆེར་དབུས་ཀྱི་གདན་སར་མཛད།།

བས༵མ་པའི་མཁྱེན་དཔྱོད་ཕུལ་དུ་ཕྱིན་པ་ཡིས།།

སྒོམ༵་པའི་ཉམས་བཞེས་སྒྲུབ་པ་མཐར་ཕྱིན་ཏེ།།

བསྟན་འཛིན་ཀུན་གྱི་གཙུག་གི་ནོར་བུར་གྱུར།།

འཆ༵ད་པས་གཞུང་བརྒྱའི་སྒོ་མོ་རྣམ་པར་ཕྱེས།།

རྩོད༵་པའི་རྣམ་དཔྱོད་འགྲན་པའི་ཟླ་དང་བྲལ།།

རྩོམ༵་པའི་མཛད་བཟང་པོད་ཆེན་བཅུ་ཕྲག་ལྷག།

ཕྱི་རབས་གདུལ་བྱའི་ཚོགས་ལ་རྟེན་དུ་མཛད།།

མཁ༵ས་པའི་མཚན་སྙན་ཡུལ་ཕྱོགས་ཀུན་ལ་ཁྱབ།།

བ༵ཙུན་པའི་རྣམ་ཐར་སྡོམ་གསུམ་ཉམས་ལེན་ཟབ།།

བཟ༵ང་བོའི་ཡོན་ཏན་མ་ལུས་ཐུགས་མངའ་བའི།།

བསྟན་འཛིན་ཁྱེད་འདྲ་དེང་དུས་ཤིན་ཏུ་དཀོན།།

ལྟ༵་བ་ཁྱད་འཕགས་མཐའ་བྲལ་དབུ་མར་གནས།།

སྒོམ༵་པ་ཟབ་མོ་མདོ་སྔགས་ཟུང་འབྲེལ་ལམ།།

སྤྱོད༵་པ་ཡང་དག་བསྟན་འགྲོ་ཡོངས་ལ་ཕན།།

ཞྭ་སེར་བསྟན་འཛིན་ཀུན་གྱི་གཙུག་གི་རྒྱན།།

སྔོན་ཚེ་མཁས་གྲུབ་དམ་པ་མང་བོའི་མདུན།།

དབང་ལུང་ཁྲིད་སོགས་ཟབ་ཆོས་མཐའ་ཡས་པ།།

ལེགས་པར་མནོས་ཏེ་གདམས་པའི་གཏེར་དུ་གྱུར།།

བསྟན་པའི་མཛོད་འཛིན་ཁྱེད་ལས་གཞན་ན་སུ།།

དེའི་ཕྱིར་ཐུགས་བསྐྱེད་ཟབ་མོས་ཉེར་དྲངས་ནས།

རྣམ་གྲོལ་དོན་གཉེར་སྐྱེ་འགྲོ་ཐམས་ཅད་ལ།།

ཆོས་ཀྱི་བདུད་རྩི་ཅི་དགར་སྦྱིན་མཛད་པས།།

དད་ལྡན་སློབ་ཚོགས་བྱེ་བའི་མགོན་དུ་གྱུར།།

བསམ་སྦྱོར་ངན་རྒུའི་བཙོན་རར་བཞུགས་དུས་སུ།།

ཐུན་མོང་སྣང་ངོར་དཀའ་བ་ཁྱད་བསད་ཀྱིས།།

དམ་པའི་རང་རྟགས་མངོན་ཞིང་འགྲོ་དོན་དུ།།

དགེ་སྦྱོར་སྒོམ་བཟླས་མཛད་ཚུལ་ངོ་མཚར་ཆེ།།

ཡང་དར་བསྟན་པའི་སྒོ་མོ་འབྱེད་པའི་ཚེ།།

བོད་ཀྱི་ཆོས་དང་རིག་གཞུང་ཐམས་ཅད་ལ།།

ཕྱག་ལས་བླ་མེད་གནང་བའི་མཛད་རྗེས་དེ།།

མཇལ་ཚེ་བཀའ་དྲིན་དད་གུས་སུས་མི་ཞུ།།

ཁྱད་པར་ཀུན་གཟིགས་པཎ་ཆེན་བཅུ་བ་ཡིས།།

ཆོས་དང་རིག་གཞུང་སླར་གསོ་མཛད་པའི་ཚེ།།

ཁོང་དང་ལྷན་དུ་བོད་ཁམས་ཕལ་མོ་ཆེར།།

ཞབས་ཀྱིས་བཅགས་ཏེ་ཕྱག་ལས་རྒྱ་ཆེར་གནང་།།

བོད་བརྒྱུད་ནང་བསྟན་སློབ་གླིང་ལ་སོགས་པའི།།

རིག་པའི་བསྟི་གནས་མང་བོར་འཆད་ཁྲིད་ཀྱིས།།

ཡུན་རིང་བསྐྱངས་པའི་སློབ་དཔོན་ཆེན་པོ་ཁྱེད།།

དེང་དུས་གངས་ལྗོངས་མ་ཧཱ་པཎྜི་ཏ།།

བསྟན་པའི་གསལ་བྱེད་ཆེན་པོར་གྱུར་པ་ནས།།

མདོ་ཁམས་སྨད་ཀྱི་དགོན་སྡེ་ཕལ་མོ་ཆེས།།

དབང་ལུང་ཁྲིད་སོགས་ཟབ་ཆོས་གང་ཞུས་པ།།

ལེགས་པར་གནང་བའི་བཀའ་དྲིན་བསམ་མི་ཁྱབ།།

མདོ་སྨད་སྐྱབས་མགོན་བརྒྱད་པ་ཆེན་པོ་གཙོས།།

མཁས་གྲུབ་བསྟན་འཛིན་བུ་ཆེན་ཐམས་ཅད་ལ།།

དབང་ལུང་ཁྲིད་སོགས་མན་ངག་མཐའ་དག་རྒྱུན།།

ལེགས་པར་སྤེལ་ཏེ་བསྟན་པའི་ཁུར་ཆེན་བཞེས།།

གདུལ་བྱའི་ཚོགས་ལ་སྨིན་བྱེད་དབང་ལུང་ཁྲིད།།

གནང་བའི་མཛད་འཕྲིན་ཆེན་པོ་སྐྱོང་ཞོར་དུ།།

དད་པའི་རྟེན་ལ་སྲས་མཁར་དགུ་ཐོག་སོགས།།

རྟེན་གསུམ་བཞེངས་པའི་རྣམ་ཐར་ཧ་ཅང་མོད།།

ཉམ་ཆུང་བདག་ཀྱང་མགོན་པོ་གང་གི་དྲུང་།།

བསྙེན་པར་རྫོགས་པ་མ་ཟད་རྡོར་ཕྲེང་དང་།།

དུས་འཁོར་དབང་ཆེན་ལ་སོགས་དབང་ལུང་ཁྲིད།།

གང་མང་ཐོབ་པའི་བཀའ་དྲིན་ཇི་ལྟར་གཞལ།།

སྐུ་ཚེ་ཧྲིལ་བོར་བསྟན་དང་འགྲོ་བའི་དོན།།

རྒྱ་ཆེར་མཛད་དེ་དགུང་གྲངས་གྱ་ལྔ་བར།།

ཉིད་ཀྱི་གདན་ས་ཡིད་དགའ་ཆོས་འཛིན་དུ།།

མཛད་པ་ཐ་མ་བསྟན་པར་གདུང་སེམས་འཕྱོ།།

དེའི་ཚེ་ཉིད་ཀྱི་གདན་ས་ཁག་གིས་གཙོས།།

ཆོས་ཀྱི་དགོན་སྡེ་མང་བོར་སྒྲུབ་མཆོད་དང་།།

བཀའ་པོད་ལྔ་སོགས་སྐྱོར་སྦྱང་དགེ་ཚོགས་ཀྱིས།།

བླ་མའི་དགོངས་རྫོགས་རྒྱ་ཆེར་བྱས་འདི་རྨད།།

མི་མངོན་དབྱིངས་ནས་བརྩེ་ཆེན་བྱིན་རླབས་དང་།།

དད་ལྡན་བུ་སློབ་ཡོངས་ཀྱིས་གསོལ་བཏབ་མཐུས།།

ངོ་མཚར་རྟགས་མཚན་སྣ་ཚོགས་ཐུན་སྣང་དུ།།

བསྟན་པའི་མཛད་བཟང་དད་པའི་ཡུལ་དུ་ཆེ།།

རེ་ཞིག་གཟུགས་སྐུ་རགས་པ་བསྡུས་སྐབས་ནས།།

དཔྱོད་ལྡན་བུ་སློབ་རྣམས་དང་མཁས་མང་གིས།།

གདུང་ཤུགས་དྲག་པོས་གསོལ་འདེབས་རྗེས་དྲན་དང་།།

རྟོགས་བརྗོད་སྙན་རྩོམ་གྲངས་མེད་མཛད་པ་མཚར།།

ལྟོས་བཅས་འགྲོ་བའི་རེ་འབྲས་སྨིན་སླད་དུ།།

བརྩེ་བའི་ཐུགས་དགོངས་ཟབ་མོ་མ་གཡེལ་བར།།

བསྟན་པའི་དཔལ་གྱུར་ཡང་སྤྲུལ་གཞོན་ནུ་ཞིག།

མི་རིང་མྱུར་དུ་འབྱོན་པར་སྙིང་ནས་གསོལ།།

དེ་ལྟར་རྗེས་དྲན་མཆོད་པའི་ཚིག་ཕྲེང་འདིས།།

དཔལ་ལྡན་བླ་མའི་མཛད་པའི་ཆ་ཙམ་ཞིག།

བརྗོད་པ་འདིས་མཚོན་དགེ་ཚོགས་ཅི་བྱས་པས།།

ཚེ་རབས་ཕྲེང་བར་ཁོང་དང་མཇལ་བར་ཤོག །

ཅེས་རྗེས་དྲན་མཆོད་པའི་ཚིག་ཕྲེང་འདི་ནི།བཀའ་དྲིན་གསུམ་ལྡན་གྱི་དཔལ་ལྡན་བླ་མ་དམ་པ།མདོ་སྔགས་རིག་གནས་དང་བཅས་པ་ལ་གཞན་དྲིང་མི་འཇོག་པའི་མཁས་དབང་ཆེན་མོ།མཚན་བརྗོད་པར་དཀའ་བ།དོན་གྱི་སླད་དུ་མཚན་ནས་སྨྲས་ན་༧རྗེ་བཙུན་བླ་མ་བསེ་ཚང་བློ་བཟང་དཔལ་ལྡན་ཆོས་ཀྱི་རྡོ་རྗེ་མཆོག་དགོངས་པ་ཆོས་དབྱིངས་སུ་བསྡུས་སྐབས།དམ་པ་ཁོང་ལས་ཡུན་རིང་ལ་ཆོས་ཀྱི་བདུད་རྩི་ཐོབ་པའི་སྐལ་བ་ཅན།རོང་བཙུན་འཇིགས་མེད་འོད་ཟེར་དུ་འབོད་པས་གདན་ས་ཆེན་པོ་རོང་བོ་དགོན་ཆེན་གྱི་རང་ཤག་ཏུ་ལྷ་བབས་དུས་ཆེན་ཉིན་སྦྱར་བ་དགེའོ།།